|
|
|
I fiori dea primavera de Maurizio Mason (PD)
Me mare me g'ha assà 'a vita, a me g'ha fato cressare; me pare me g'ha insegnà a vivarla, 'sta vita, co' i so' intopi, co' e so' paure... Ricordo me nona, vecia, tuta storta, che a rideva, smissiando 'a puenta, no a ghe xé pì, desso a xé morta. Ma ricordo anca me nono, col so' toscan, el me voea ben, el me imbrassava. El xé 'ndà via anca jù, desso el xé lontan. Me ricordo l'odore de chél fen, che petài dal caldo 'ndàimo a smissiar, vedo, vedo ancora i fiori dea primavera che i se sarìa dissipai, doman. I toévo su, i vardavo, i nasàvo. I jera come mì e tì, bèi desso, doman fiàpi. A xé a vita. Fata de minuti, de ore, de mesi, de ani, se te vói. Ma che a passa so un attimo. Cossa restarà de mi e ti, dee nostre corse, dei nostri pianti. Cossa restarà de 'na vita che no g'ha senso sensa un Dio che te juta, che te ciape par man come che féa mé mama. Cossa restarà de un cuore cativo ma che pianze, che pianze se el ripensa a ti mama, dove sito, a ti pare, torna qua! I fiori dea primavera. Doman i xé dissipai!
***
La osse de la parona de Moreno Menini (VR)
La lengoa de le done no la tase mai un menuto par nissun j-è robe bone ch’el sia belo medio o bruto
Co le spale te ghe giri dopo erle saludà co la preci∫ion dei ∫biri le te gà zà tichetà
-Chelo magna massa a tola -L’altro bée a l’ostaria -St’altro gà na bruta fiola Ancora pèso de so sia.
Te le scolti inte la corte tute in mucia a fare ròsso a ∫braiar del so consorte da negarlo rento el fosso
E su le bale che le conta pur de farla ancor pì grossa le ghe mete anca la zonta la pì stranba che le possa
De la piassa j-è parone dal dominio incontrastà gnan el sìndico se opone a na calunia zà spuà!
E cossì sensa rason che de fati ghe sia segno nasse corni in proporsion a l’estro del so in∫egno
pori omani sparlè preti sìndici o dotori par ognun a rua ghe n’è no i se salva gnanca lori
e no resta soluzion pa’i sogeti barsaliè che mocarla par benon sinò replica i s’en ciapa ancor piassè
la morale presto è dita e s-ceta dirla mi vorìa: se la dona no sta sita l’è na rogna mai fenìa
Moreno Menini
|
